റഷ്യ ഇന്ത്യയുടെ ഏറ്റവും വലിയ സൂര്യകാന്തി എണ്ണ വിതരണക്കാരനായി

🌻 റഷ്യ ഇന്ത്യയുടെ ഏറ്റവും വലിയ സൂര്യകാന്തി എണ്ണ വിതരണക്കാരനായി

ന്യൂഡൽഹി: കഴിഞ്ഞ നാല് വർഷത്തിനിടെ ഇന്ത്യയിലേക്ക് റഷ്യൻ സൂര്യകാന്തി എണ്ണ ഇറക്കുമതി 12 മടങ്ങ് വർധിച്ച്, റഷ്യയെ രാജ്യത്തിന്റെ ഏറ്റവും വലിയ വിതരണക്കാരനാക്കി. ഇതോടെ ഈ മേഖലയിൽ വർഷങ്ങളായി മുൻതൂക്കം പുലർത്തിയിരുന്ന ഉക്രെയ്ന്‍ പിന്നിലായി.

ഇന്ത്യ ലോകത്തിലെ ഏറ്റവും വലിയ ഭക്ഷ്യ എണ്ണ ഇറക്കുമതിക്കാരിലൊന്നാണ്. ആഭ്യന്തര ആവശ്യങ്ങൾ നിറവേറ്റുന്നതിനായി രാജ്യം പ്രധാനമായും സൂര്യകാന്തി സോയാബീൻ , പാം ഓയിൽ എന്നിവ ഇറക്കുമതി ചെയ്യുന്നു. 2020 മുതൽ 2024 വരെയുള്ള കാലയളവിൽ, റഷ്യയിൽ നിന്ന് സൂര്യകാന്തി എണ്ണയുടെ ഇറക്കുമതി 12 മടങ്ങ് വർധിച്ചത്, വിലസ്ഥിരതയും വിതരണസൗകര്യവും ഉറപ്പാക്കിയതുകൊണ്ടാണ് എന്നാണ് വിദഗ്ധർ വ്യക്തമാക്കുന്നത്.

റഷ്യയും ഉക്രെയ്നും ലോകത്തിലെ പ്രധാന സൂര്യകാന്തി എണ്ണ ഉത്പാദകരാണ്. എന്നാൽ ഉക്രെയ്ന്‍–റഷ്യ യുദ്ധം തുടങ്ങിയതോടെ ഉക്രെയ്ന്‍റെ ഉത്പാദനത്തിലും കയറ്റുമതിയിലും തടസ്സങ്ങൾ നേരിട്ടു. അതേ സമയം, റഷ്യ ഇന്ത്യയുമായി വ്യാപാര ബന്ധം ശക്തമാക്കി എണ്ണ വിതരണത്തിൽ മുൻതൂക്കം പിടിച്ചു.

വ്യാപാരവൃത്തങ്ങൾ പറയുന്നതനുസരിച്ച്, റഷ്യൻ എണ്ണയുടെ ഗുണമേന്മയും വിലയും ഇന്ത്യൻ വിപണിക്ക് അനുയോജ്യമാണെന്ന് തെളിഞ്ഞതോടെ, ഇന്ത്യൻ ഇറക്കുമതിക്കാർ റഷ്യയിലേക്ക് കൂടുതൽ ശ്രദ്ധതിരിച്ചു. ഇതോടെ ഉക്രെയ്ന്‍ വിപണി പങ്ക് നഷ്ടപ്പെട്ടു, റഷ്യ ഇന്ത്യയുടെ പ്രധാന സൺഫ്ലവർ ഓയിൽ പങ്കാളിയായി മാറി.

വിദഗ്ധരുടെ കണക്കുകൾ പ്രകാരം, ഈ പ്രവണത തുടർന്നാൽ അടുത്ത വർഷങ്ങളിൽ റഷ്യ–ഇന്ത്യ വ്യാപാരബന്ധം കൂടുതൽ ശക്തിയാർജ്ജിക്കുമെന്നും ഭക്ഷ്യവിലയിൽ സ്ഥിരത ഉണ്ടാക്കുമെന്നും പ്രതീക്ഷിക്കുന്നു

.