ഇറാനെതിരെ ബഹ്‌റൈൻ :
ഇറാനെതിരെ ബഹ്‌റൈൻ; ഡ്രോൺ ആക്രമണങ്ങളിൽ കടുത്ത ആരോപണം
മനാമ: ബഹ്‌റൈനു നേരെയുണ്ടായ ഡ്രോൺ ആക്രമണങ്ങൾക്ക് ഇറാൻ പൂർണമായും ഉത്തരവാദിയാണെന്ന് ആരോപിച്ച് ബഹ്‌റൈൻ വിദേശകാര്യ മന്ത്രാലയം രംഗത്ത്. വെള്ളിയാഴ്ചയും ഞായറാഴ്ചയും രാജ്യത്തെ ലക്ഷ്യമിട്ട് നടന്നതായി പറയപ്പെടുന്ന വ്യോമാക്രമണങ്ങൾ പ്രതിരോധ സംവിധാനങ്ങൾ ഉപയോഗിച്ച് തടയുകയും ഇറാനിയൻ ആയുധങ്ങൾ തകർക്കുകയും ചെയ്തതായി ബഹ്‌റൈൻ അറിയിച്ചു.
നവംബർ 13 വെള്ളിയാഴ്ച പുലർച്ചെ രണ്ട് ഡ്രോണുകളാണ് ബഹ്‌റൈനെ ലക്ഷ്യമിട്ടതെന്നാണ് റിപ്പോർട്ടുകൾ. നവംബർ 15 ഞായറാഴ്ചയും സമാനമായ ആക്രമണശ്രമമുണ്ടായതായി ബഹ്‌റൈൻ പ്രതിരോധ സേന വ്യക്തമാക്കി. രാജ്യത്തിന്റെ വ്യോമപ്രതിരോധ സംവിധാനങ്ങൾ ആക്രമണങ്ങളെ ലക്ഷ്യത്തിലെത്തുന്നതിന് മുമ്പ് തടഞ്ഞതായും അധികൃതർ അറിയിച്ചു.
ബഹ്‌റൈനിലെ അൽ-റിഫാ ഹെലികോപ്റ്റർ താവളത്തിലുള്ള അമേരിക്കൻ വ്യോമപ്രതിരോധ റഡാർ കേന്ദ്രം ലക്ഷ്യമിട്ട് ആറ് ഡ്രോണുകൾ വിക്ഷേപിച്ചതായി ഇറാന്റെ ഇസ്‌ലാമിക് റെവല്യൂഷണറി ഗാർഡ് കോർപ്സ് (IRGC) അവകാശപ്പെട്ടു.
എന്നാൽ ഇറാന്റെ ആക്രമണങ്ങളെ ബഹ്‌റൈൻ ശക്തമായി അപലപിച്ചു. രാജ്യത്തിന്റെ പരമാധികാരത്തിനും ഭൂപ്രദേശത്തിന്റെ അഖണ്ഡതയ്ക്കും നേരെയുള്ള കടന്നുകയറ്റമാണിതെന്ന് വിദേശകാര്യ മന്ത്രാലയം വ്യക്തമാക്കി. ഇത്തരം ആക്രമണങ്ങൾ മേഖലയിൽ സമാധാനം പുനഃസ്ഥാപിക്കാനുള്ള നയതന്ത്ര ശ്രമങ്ങളെ ദുർബലപ്പെടുത്തുന്നതായും മന്ത്രാലയം ആരോപിച്ചു.
ആക്രമണങ്ങളുടെയും അവയുടെ പ്രത്യാഘാതങ്ങളുടെയും പൂർണ ഉത്തരവാദിത്തം ഇറാനാണെന്നും ബഹ്‌റൈൻ വ്യക്തമാക്കി. രാജ്യത്തെ പൗരന്മാരുടെയും താമസക്കാരുടെയും സുരക്ഷ ഉറപ്പാക്കാൻ പ്രതിരോധ സേന അതീവ ജാഗ്രതയിൽ തുടരുകയാണ്.
അമേരിക്കൻ നാവികസേനയുടെ അഞ്ചാം കപ്പൽപ്പടയുടെ ആസ്ഥാനം സ്ഥിതി ചെയ്യുന്ന ബഹ്‌റൈനിലെ സംഭവവികാസങ്ങൾ ഗൾഫ് മേഖലയിലെ സുരക്ഷാ സാഹചര്യത്തെ വീണ്ടും ആശങ്കയിലാക്കിയിട്ടുണ്ട്. അമേരിക്കയും ഇറാനും തമ്മിലുള്ള സംഘർഷങ്ങൾക്കിടയിലാണ് പുതിയ സംഭവങ്ങൾ.
