പ്രതിപക്ഷ നേതാവ് മുഖ്യമന്ത്രിയുമായി ഓണസദ്യയിൽ പങ്കെടുത്തത് ശരിയായില്ല’ – കെ. സുധാകരൻ

കുന്നംകുളം കസ്റ്റഡി മർദനം: ‘ദൃശ്യങ്ങൾ പുറത്ത് വന്ന ദിവസം പ്രതിപക്ഷ നേതാവ് മുഖ്യമന്ത്രിയുമായി ഓണസദ്യയിൽ പങ്കെടുത്തത് ശരിയായില്ല’ – കെ. സുധാകരൻ

കണ്ണൂർ: കുന്നംകുളത്ത് നടന്ന കസ്റ്റഡി മർദന ദൃശ്യങ്ങൾ പുറത്ത് വന്ന ദിവസം തന്നെ പ്രതിപക്ഷ നേതാവ് മുഖ്യമന്ത്രിയോടൊപ്പം ഓണസദ്യയിൽ പങ്കെടുത്തത് ശരിയായ നടപടിയല്ലെന്ന് മുൻ കെപിസിസി അധ്യക്ഷനും മുതിർന്ന കോൺഗ്രസ് നേതാവുമായ കെ. സുധാകരൻ പ്രതികരിച്ചു.

“താനായിരുന്നെങ്കിൽ അത്തരത്തിൽ ഒരിക്കലും ചെയ്തിരിക്കില്ല. മനുഷ്യാവകാശവും ജനാധിപത്യവും അപമാനിക്കുന്ന രീതിയിലാണ് കുന്നംകുളത്ത് നടന്ന കസ്റ്റഡി മർദനം. ഇത്തരത്തിൽ മനുഷ്യത്വരഹിതമായ പ്രവർത്തനങ്ങൾക്കെതിരെ കോൺഗ്രസ് നിയമപരമായി ശക്തമായ പോരാട്ടം നടത്തും” – സുധാകരൻ വ്യക്തമാക്കി.

കസ്റ്റഡി മർദനവുമായി ബന്ധപ്പെട്ട ദൃശ്യങ്ങൾ പുറത്ത് വന്നതോടെ സംസ്ഥാനത്തുടനീളം വലിയ പ്രതിഷേധം ഉയർന്നിരുന്നു. പ്രതിപക്ഷവും മനുഷ്യാവകാശ സംഘടനകളും പൊലീസിനെതിരെ ശക്തമായ വിമർശനം ഉന്നയിക്കുന്ന സാഹചര്യത്തിലാണ് സുധാകരന്റെ പ്രസ്താവന കൂടുതൽ ശ്രദ്ധ നേടുന്നത്.