കണ്ണൂര്‍: വീടിനു സമീപത്തുള്ള കോഴിക്കൂടിനരികെ നിന്നും ബോംബു നിര്‍മ്മാണത്തിനിടെ പൊട്ടിത്തെറിച്ച്‌ കൈവിരലുകളറ്റ ആര്‍.
എസ്. എസ് നേതാവിനെ പെരിങ്ങോം പൊലിസ് അറസ്റ്റു ചെയ്തു.




ബുധനാഴ്‌ച്ച വൈകുന്നേരം മൂന്ന് മണിയോടെയാണ് കോഴിക്കോട് ജില്ലയിലെ സ്വകാര്യ ആശുപത്രിയില്‍ ചികിത്സയില്‍ കഴിയുകയായിരുന്ന ആര്‍. എസ്. എസ മുന്‍ ജില്ലാകാര്യവാഹക് കാങ്കോല്‍ ആലക്കാട്ടെ ബിജുവിനെ പെരിങ്ങാംസ്റ്റേഷന്‍ ഹൗസ് പൊലീസ് ഇന്‍സ്പെക്ടര്‍ സുഭാഷിന്റെ നേതൃത്വത്തിലുള്ള പൊലിസ് സംഘം അറസ്റ്റു ചെയ്തത്. പ്രതിയെ പയ്യന്നൂര്‍ ചീഫ് ജുഡീഷ്യല്‍ മജിസ്ട്രേറ്റ് കോടതിയില്‍ ഹാജരാക്കി റിമാന്‍ഡ് ചെയ്തു.
കഴിഞ്ഞ ശനിയാഴ്‌ച്ച വീടിനു സമീപത്തെ കോഴിക്കൂടിനു സമീപംവച്ചാണ് ഉച്ചയ്ക്ക് 12 മണിയോടെ ഉഗ്രശബ്ദത്തില്‍ ബോംബ് പൊട്ടിത്തെറിച്ചത്.



പ്രദേശവാസികള്‍ ഉഗ്രശബ്ദം കേട്ടിരുന്നുവെങ്കിലും പൊട്ടിയത് ബോംബാണെന്ന് അന്ന് വൈകുന്നേരമാണ് നാട്ടുകാരും പൊലിസും അറിയുന്നത്. തുടര്‍ന്ന് പൊലീസ് ബിജുവിന്റെ വീട്ടിലെത്തി പരിശോധന നടത്തി. അപകടം നടന്ന സ്ഥലത്തു നിന്നും പ്ലാസ്റ്റിക് കണ്ടെയ്നര്‍ കണ്ടെത്തിയിരുന്നു. സ്ഫോടനത്തില്‍ ബിജുവിന്റെ രണ്ടുവിരലുകളറ്റിരുന്നു.
കഴിഞ്ഞ ദിവസം ഫോറന്‍സിക് വിഭാഗം നടത്തിയ പരിശോധനയിലാണ് ബോംബു നിര്‍മ്മാണത്തിനിടെയാണ് അപകടമുണ്ടായതെന്ന് വ്യക്തമായത്. നേരത്തെ കോഴിക്കോട് ജില്ലയിലെ ഉള്ള്യേരിയിലെ സ്വകാര്യ ആശുപത്രിയില്‍ പ്രവേശിപ്പിക്കപ്പെട്ട ബിജു നാട്ടിലെ അമ്ബലത്തിലെ ഉത്സവത്തിനായി പടക്കം നിര്‍മ്മിക്കുന്നതിനിടെ പൊട്ടിത്തെറിച്ചതാണെന്നാണ് പറഞ്ഞിരുന്നത്.
എന്നാല്‍ പിന്നീട് ഇയാള്‍ പൊലിസിന് മൊഴി നല്‍കിയത് പന്നിപ്പടക്കം കെട്ടുന്നതിനിടെയാണ് അപകടമുണ്ടായതെന്നാണ്. എന്നാല്‍ സ്ഫോടനമുണ്ടായതിനു ശേഷം ഉടനെയെത്തിയ വാഹനത്തില്‍ ഒരാള്‍ ബിജുവിനെയും കൂട്ടി ആശുപത്രിയിലേക്ക് രഹസ്യമായി പോയെന്ന് പ്രദേശവാസികള്‍ മൊഴി നല്‍കിയിരുന്നു. ഇയാളെ തിരിച്ചറിഞ്ഞിട്ടുണ്ടെന്ന് പൊലിസ് അറിയിച്ചു.
പയ്യന്നൂര്‍ കുന്നരുവിലെ സി.പി. എം പ്രവര്‍ത്തകന്‍ ധനരാജ് വധക്കേസിലുള്‍പ്പെടെ ബിജു നിരവധി കേസിലെ പ്രതിയാണ് ബിജുവെന്ന് പൊലിസ് പറഞ്ഞു. നേരത്തെയും ഇയാളുടെ വീട്ടില്‍ സ്ഫോടനമുണ്ടാവുകയും അമ്മയുള്‍പ്പെടെയുള്ള കുടുംബാംഗങ്ങള്‍ക്ക് പരുക്കേല്‍ക്കുകയും ചെയ്തിരുന്നു.



Leave a Reply